KEN E HÒMBER DI ROMANONAN 7 TA? Les 8 di kuartaal 4, aña 2017 Lesa pa e siman aki: Romanonan 7:1-25 TEKSTO PRINSIPAL: "Ma awor nos a wòrdu librá di Lei, siendo ku nos ta morto pa e lei ku tabatin nos mará, asina ku nos ta sirbi den e estado nobo di e Spiritu i no den e estado bieu di e lèter" (Romanonan 7:6). KEN E HÒMBER DI ROMANONAN 7 TA? sabbat, 18-11-2017 TIKI KAPÍTULO DEN BEIBEL: a krea mas kontroversha ku Romanonan 7 a krea. Di akuèrdo ku e asuntunan enbolbi, The SDA Bible Commentary ta bisa: "E nifikashon di [Romanonan 7:14-25] tabata un di e problemanan mas diskuti den henter e epistolá. E preguntanan prinsipal tabata si e deskripshon di un lucha moral asina intenso por ta autobiográfiko, i si esei ta e kaso, si e teksto ta referi na Pablo su eksperensha promé i despues di su kombershon. Ku Pablo ta papiando di su mes lucha personal ku piká ta parse evidente for di e nifikashon di mas simpel di su palabranan (cf. [Romanonan 7:7-11]). [Ellen G. White, Kaminda na Kristu, kap. 2, p. 19; Ellen G. White, Testimonies for the Church, vol. 3, kap. 40, p. 475.] Realmente tambe ta bèrdat ku e ta deskribiendo un konflikto ku ta ser eksperenshá masomenos pa kada alma ku ta ser konfrontá pa i ta ser lantá pa e derechonan spiritual di Dios Su santu lei." The SDA Bible Commentary, vol. 6, kap. 7, p. 553. Studiadónan di Beibel ta diferenshá den e echo ku sea Romanonan 7 tabata Pablo su eksperensha promé òf despues di su kombershon. Kualke banda ku bo tuma, loke ta importante ta ku Hesus Su hustisia ta kubri nos i ku ta den Su hustisia nos ta para perfekto dilanti di Dios, Kende ta priminti di santifiká nos, pa duna nos viktoria riba piká, i pa laga nos bira konforme "e imagen di Su Yu" (Rom. 8:29). 1 / 9
MORTO PA E LEI djadumingu, 19-11-2017 Lesa Romanonan 7:1-6. Kua ilustrashon Pablo ta usa akinan pa por mustra su lesadónan nan relashon pa ku e lei, i kua punto e ta tresiendo dilanti ku e ilustrashon ei? Pablo su ilustrashon den Romanonan 7:1-6 ta enbolbi un tiki, pero un análisis kuidadoso di e tekstonan aki lo yuda nos pa komprondé su rasonamentu. Den e konteksto kompleto di e karta, Pablo tabata trata e sistema di adorashon stablesi na Sinai; esei ta loke e kiermen hopi bia ku e palabra lei. E hudiunan tabatin difikultat pa komprondé e echo ku e sistema aki, ku Dios a duna na nan, mester kaba ku e binida di e Mesias. Esaki tabata loke Pablo tabata tratando kreyentenan hudiu ku ainda no ta kla pa bandoná loke tabata un parti asina importante di nan bida. Den esensia, Pablo su ilustrashon ta lo siguiente: un muhé ta kasá ku un hòmber. E lei ta mar'é na e hòmber mientras e hòmber ta na bida. Durante di su bida, e muhé no por uni ku otro hòmber. Pero ora ku e hòmber fayese, e ta liber di e lei ku ta mar'é na e hòmber (Rom. 7:3). Kon Pablo ta apliká e ilustrashon di e lei di matrimonio na e sistema di hudaismo? Rom. 7:4, 5. Meskos ku e morto di e esposo ta libra e muhé for di e lei di su esposo, asina e morto di e bida bieu den e karni, pa medio di Hesu-Kristu, ta libra e hudiunan for di e lei ku nan mester a warda te na momentu ku e Mesias a kumpli ku su tipo. Awor e hudiunan tabata liber pa "kasa di nobo". Nan a ser invitá pa kasa ku e Mesias resusitá i asina duna fruta na Dios. E ilustrashon aki tabata un aparato mas ku Pablo a usa pa konvensé e hudiunan ku awor nan tabata liber pa bandoná e sistema antiguo. Atrobe, mirando tur e kosnan aki ku Pablo i e Beibel ta bisa tokante di obediensia na e Dies Mandamentunan, no tin sentido pa afirmá akinan ku Pablo tabata bisando e kreyentenan hudiu aki ku e Dies Mandamentunan no tabata nesesario mas. Esnan ku ta usa e tekstonan aki pa saka e konklushon ei ku e Iei moral a ser butá un banda realmente no ke saka e konklushon ei; loke realmente nan ke bisa ta ku solamente e Sabat di e di shete dia a ser kitá no sobrá di e lei. Si interpretá Romanonan 7:4, 5 komo un teksto ku ta siña hende ku e di kuater mandamentu a ser aboli òf kambiá òf remplasá pa e djadumingu, ta nifiká ku e palabranan ei ta haña nifikashon ku nunka tabata e intenshon pa nan haña. 2 / 9
PIKA I E LEI djaluna, 20-11-2017 Si Pablo ta papiando tokante di henter e sistema di lei na Sinai, kon por splika Romanonan 7:7, den kua spesifikamente e ta menshoná un di e Dies Mandamentunan? Esei no ta kontradesi e posishon ku a ser tumá ayera ku Pablo no tabata papiando tokante di abolishon di e Dies Mandamentunan? E kontesta ta "No." Nos mester keda kòrda, atrobe, ku e palabra lei pa Pablo ta henter e sistema introdusí na Sinai, ku ta inkluí e lei moral pero ku no a ser limitá na nan. P'esei, Pablo por a síta for di dje, meskos ku for di kualkier otro sekshon di henter e ekonomia hudiu, pa e por splika su punto. Sinembargo, ora ku e sistema a ser kitá na e morto di Kristu, esei no a inkluí e lei moral ku tabata eksisti asta promé ku Sinai i ta eksisti despues di Kalvario tambe. Lesa Romanonan 7:8-11. Kiko Pablo ta bisando akinan tokante di e relashon entre e lei i piká? Dios a revelá Su mes na e hudiunan, kontando nan ku detayes kiko tabata korekto i kiko tabata robes den asuntunan moral, sivil, seremonial i di salú. Tambe El a splika e kastigunan pa violashon di e varios leinan. Violashon di e boluntat revelaa di Dios ta ser defeni akinan komo piká. Pues, Pablo ta splika, e lo no tabata sa ku ta un piká pa kudishá sin a ser informá di esei pa medio di e "lei". Piká ta e violashon di e boluntat revelá di Dios, i kaminda e boluntat revelá no ta konosi, no tin konosementu di piká. Ora ku un persona konosé e boluntat revelá ei, e ta bin rekonosé ku e ta un pekador i ku e ta bou di kondenashon i morto. Den e sentido aki, e persona ta muri. Den Pablo su liña di argumentu akinan i atraves di e sekshon aki, e ta purbando na konstrui un brug pa laga e hudiunan kende ta duna reverensha na e "lei" por mira Kristu komo su kumplimentu. E ta mustrando ku e lei tabata nesesario pero ku su funshon tabata limitá. E intenshon di e lei tabata pa mustra e nesesidat di salbashon; e intenshon nunka tabata pa ta e medio pa optené e salbashon ei. "E apòstel Pablo, relashonando su eksperensha, ta presentá un bèrdat importante tokante di e trabou ku mester ser hasi den kombershon. E ta bisa `tabatin un tempu ku mi tabata na bida sin e lei' e no tabata sinti kondenashon; `pero ora ku e kondenashon a bini,' óra ku e lei di Dios a ser tresi na su konsenshi, `piká a rebibá, i ami a muri.' E ora ei el a mira su mes komo un pekador, kondená pa e lei divino. Pagatinu, tabata Pablo, i no e lei, ku tabata esun ku a muri." Ellen G. White Comments, The SDA Bible Commentary, vol. 6, kap. 7, p. 1076. Den ki sentidu bo a "muri" dilanti di e lei? Kon, den e konteksto ei, bo por komprondé 3 / 9 kiko Hesus a hasi pa bo dunando bo un bida nobo den dje?
4 / 9
E LEI TA SANTU djamars, 21-11-2017 Lesa romanonan 7:12. Kon nos por komprondé e teksto aki den e konteksto di loke Pablo a bin ta splikando? Pasobra e hudiunan tabata reverenshá e lei, Pablo tabata eksalt'é den tur manera posibel. E lei ta bon pa loke e ta hasi, pero e no por hasi loke nunka el a ser butá pa hasi salba nos for di piká. Pa esei nos mester di Hesus, pasobra e lei sea ta henter e sistema hudiu òf e lei moral en partikular no por trese salbashon. Solamente Hesus i Su hustisia, ku ta bini na nos pa medio di fe, por hasi esaki. Kiko Pablo ta duna e kulpa pa su kondishon di "morto," i kiko e ta no ta duna e kulpa? Dikon e distinshon ei ta importante? Rom. 7:13. Den romanonan 7:13, Pablo ta presentando e "lei" den e mihó sentido posibel. E ta skohe pa kulpa piká, no e lei, pa su teribel kondishon pekaminoso; kual ta, produsiendo den dje "tur sorto di kudishi" (Rom. 7:8). E lei ta bon, pasobra eta Dios Su standarte di kondukta, pero komo un pekador Pablo ta para kondená su dilanti. Dikon piká tabata asina eksitoso pa mustra Pablo komo un pekador teribel? Rom. 7:14, 15. Karnal ta nifiká "di karni." Pues, Pablo tabatin mester di Hesu-Kristu. Solamente Hesu-Kristu por a kita e kondenashon (Rom. 8:1). Solamente Hesu-Kristu por a libr'é for di sklabitut di piká. Pablo ta deskribi su mes komo "bendi pa piká" E ta un katibu di piká. E no tin libertat. E no por hasi loke e ke hasi. E ta purba na hasi loke e bon lei ta bis'é pa hasi, pero piká no ta lagu'é. Pa medio di e ilustrashon aki, Pablo tabata purba na mustra e hudiunan nan nesesidat di e Mesias. El a mustra kaba ku viktoria ta posibel solamente bou di grasia (Rom. 6:14). E mesun pensamentu aki ta ser re-enfatisá den Romanonan 7. Bibando bou di e "lei" ta nifiká sklabitut na piká, un maestro sin misèrikòrdia. Kiko tabata bo propio eksperensha ku e manera ku piká ta hasi hende katibu? Bo a yega di purba hunga ku piká, pensando ku bo por kontrol'é manera bo ta deseá, pero despues a haña bo mes bou di un maestro kruel i sin misèrikòrdia? Bonbini na realidat! Pakiko anto, bo mester someté na Hesus i laga e "ami" muri diariamente? 5 / 9
6 / 9
E HÒMBER DI ROMANONAN 7 djarason, 22-11-2017 "Ma si mi ta hasi eksaktamente loke mi no ta deseá di hasi, mi ta bai di akuèrdo ku Lei, ku e si ta bon. Ma awor, no ta ami ta esun mas ku ta hasié, ma piká ku ta biba den mi" (Rom. 7:16, 17). Kua lucha ta ser presentá akinan? Usando e lei manera un spil, e Spiritu Santu ta konvensé un persona ku e ta desagradando Dios ora e no ta kumpli ku e rekerimentunan di e lei. Pa medio di esfuersonan pa kumpli ku e rekerimentunan ei, e pekador ta mustra ku e ta bai di akuèrdo ku e lei ta bon. Kua puntonan ku Pablo a trese dilanti kaba el a ripiti pa enfatisá? Rom. 7:18-20. Pa laga un pesona komprondé su nesesidat di Kristu, e Spiritu Santu hopi biaha ta guia e persona pa medio di un tipo di eksperensha manera di un "aliansa bieu". Ellen G. White ta deskribi Israel su eksperensha di e siguiente manera: "E hendenan no a realisá e pekaminosidat di nan propio kurason, i ku sin Kristu tabata imposibel pa nan por warda Dios Su lei; i nan a drenta den un aliansa ku Dios kaba. Sintiendo ku nan tabata por a stablesé nan propio hustisia, nan a deklará, 'Tur loke Señor a bisa, nos lo hasi, i nos lo ta obedesido.' Eksodo 24:7. Solamente algun siman a pasa promé ku nan a kibra nan pakto ku Dios, i a hinka rudia pa adorá un imagen grabá. Nan no por a spera riba e fabor di Dios pa medio di e aliansa ku nan a kibra; i awor, mirando nan pekaminosidat i nan nesesidat pa pordon, nan a bin sinti e nesesidat di e Salbador revelá den e aliansa di Abraham." Ellen G. White, Patriarchs and Prophets, kap. 32, pag. 371, 372. Desafortunadamente, pasobra nan a faya den renobá nan dedikashon na Kristu diariamente, hopi kristian ta sirbiendo piká, maske kon repugnante e ta pa atmiti esaki. Nan ta rashonalisá ku, den realidat, nan ta pasando den e eksperensha normal di santifikashon i ku simplemente ainda nan tin un kaminda largu pa kana. Pues, na lugá di hiba pikánan konosi na Kristu i pidi'é viktoria riba nan, nan ta skonde nan tras di Romanonan 7, ku ta bisa nan, segun nan, ku ta imposibel pa hasi loke ta korekto. Realmente, e kapitulo aki ta bisando ku ta imposibel pa hasi loke ta korekto ora ku un persona ta katibu di piká, pero viktoria ta posibel den Hesu-Kristu. Bo tin e viktorianan riba e "ami" i riba piká ku Kristu a primintí nos? Si esei no ta e kaso, dikon bo ta kere? Kua eskohonan robes bo ta hasiendo riba bo mes? 7 / 9
SALBÁ FOR DI MORTO djaweps, 23-11-2017 Lesa Romanonan 7:21-23. Kon bo a eksperenshá e mesun lucha aki den bo bida, asta siendo un Kristian? Den e tekstonan aki, Pablo ta igualá e lei den su miembronan (su kurpa) ku e lei di piká. "Ku e karni," Pablo ta bisa, el a sirbi "e lei di piká" (Rom. 7:25). Pero pa sirbi piká i pa obedesé su lei ta nifiká morto (wak Rom. 7: 10, 11, 13). P'esei, su kurpa mientras e tabata funshoná den obedensia na piká por a ser deskribí komo "e kurpa di su morto." E lei di su mente ta Dios Su lei, Dios Su revelashon di Su boluntat. Bou di konvikshon di e Spiritu Santu, Pablo a bai di akuerdo ku e lei aki. Su mente tabata desidido pa warda e lei ei, pero ora e tabata purba e no tabata logra pasobra su kurpa tabata ke hasi piká. Ken no a yega di sinti e mesun lucha? Den bo mente bo sa kiko bo ke hasi, pero bo karni ta sklama pa algu otro. Kon nos por ser reskatá for di e situashon difisil aki den kua nos ta haña nos mes? Rom. 7:24, 25. Algun hende a puntra nan mes dikon, despues di a alkansá e klimaks glorioso den e ekspreshon di "mi ta gradisí Dios pa medio di Hesu-Kristu nos Señor," Pablo mester referí un biaha mas na e luchanan di e alma pa kua aparentemente el a ser librá. Algun hende ta komprondé e ekspreshon di gradisimentu aki komo un sklamashon entre paréntesis. Nan ta kere ku despues di un sklamashon asina naturalmente ta sigui un gritu, "Ken lo libra?" Nan ta tene esei, promé ku nan sigui ku un diskushon mas ekstenso di e liberashon glorioso (Romanonan 8), Pablo ta resumí loke el a bisa den e promé vèrsikulonan i ta bolbe konfesá tokante di e konflikto kontra di e forsanan di piká. Otronan ta bisa ku ora Pablo bisa "ami mes" e kiermen "den mi mes man, lagando Kristu for di e asuntu." Kon ku Romanonan 7:24, 25 ser interpretá, un punto mester keda bon kla: si nos laga e kos den nos man, sin Kristu, nos ta sin yudansa kontra piká. Ku Kristu nos tin un bida nobo den dje, unu den kua maske e "ami" ta bini dilanti konstantemente e promesanan di viktoria ta di nos si nos skohe pa tene na nan. Meskos ku niun hende no por hala rosea pa bo òf tosa pa bo òf nister pa bo, niun hende no por skohe pa entrega na Kristu pa bo. Abo so por hasi e eskoho ei. No tin niun otro manera pa bo por haña e viktorianan ku a ser primintí na nos den Hesus. 8 / 9
Powered by TCPDF (www.tcpdf.org) PENSAMENTU MAS PROFUNDO: djabierne, 24-11-2017 "No tin siguridat ni sosiegu ni hustifikashon den kibramentu di e lei. Hende no por spera di para inosente dilanti di Dios, i na pas kun'e, pa medio di e meritonan di Kristu, si e ta sigui den piká'' Ellen G. White, Selected Messages, buki 1, kap. 26, p. 213. "Pablo ta deseá pa su rumannan por mira ku e gran gloria di un Salbador ku ta pordoná piká a duna nifikashon na henter e ekonomia hudiu. E ta deseá pa nan por mira tambe ku ora Kristu a bini na e mundu, i a muri komo un sakrifisio pa hende, tipo a enkontrá ku antitipo. "Despues ku Kristu a muri na e krus komo un ofrenda di piká, e lei seremonial no por tabatin fórsa mas. Apesar di esei, e tabata konektá na e lei moral, i tabata glorioso. Tur tabata tin e stèmpel di divinidat, i a ekspresá e santidat, huisio i hustisia di Dios. I si e ministerio di e dispensashon ku a ser kitá tabata glorioso, kuantu mas glorioso e realidat mester ta, ora ku Kristu a ser revelá, dunando Su Spiritu ku ta duna bida i ku ta santifiká na kada un ku ta kere." Ellen G. White Comments, The SDA Bible Commentary, vol. 6, kap. 3, p. 1095. PREGUNTANAN PA DISKUSHON: "Den Rom: 7:25 e apóstelnan a skirbi: `Ku mi mente mi ta sirbi e lei di Dios, ma di otro banda, ku mi karni e lei di piká: Esakinan ta e tekstonan di mas kla, i for di dje nos ta siña ku e mesun persona (kreyente) ta sirbi e Lei di Dios pareu ku e ta sirbi e Lei di piká. E ta hustifiká pero na mesun momentu e ta an pekador (simuliustus est et peccat); pasobra e no ta bisa: `Mi mente ta sirbi e Lei di Dios'; tampoko e ta bisa: `Mi karni ta sirbi e Lei di piká'; pero e ta bisa: `Mi mes.' Esei ta nifiká e persona kompleto, un i e mesun persona, ta den e sirbishi di dos banda aki. Pa e motibu aki e ta gradisi Dios ku e ta sirbi e Lei di Dios i ku e ta roga pa miserikòrdia pa motibu ku e ta sirbi e Lei di piká. Pero niun hende no por bisa di un persona karnal (no-komberti) ku e ta sirbi e Lei di Dios. E apòstel kiermen: B'a mira, ta meskos ku mi a bisa promé: E santunan (kreyentenan) ta pekador tambe na e mesun momento mientras ku nan ta hustu tambe. Nan ta hustu, pasobra nan ta kere den Kristu, Kende Su hustisia ta kubri nan i ta ser duná den nan. Pero nan ta pekadornan, di tal manera ku nan no ta kumpli ku e Lei, i ku ainda nan tin pashonnan pekaminoso. Nan ta manera henden malu ku ta ser tratá pa un dòkter. Nan ta hopi malu, pero nan ta spera i nan ta kuminsá bira bon òf kuminsá wòrdu kurá. Nan ta bai bolbe haña nan salú. Pashentnan asina lo sufri e daño di e mas grandi dor di bisa arogantemente ku nan ta bon di salú, pasobra nan lo sufri un re-kaida ku lo ta pió (ku nan promé malesa)." Martin Luther, Commentary on Romans, pag. 114, 115. Nos por bai diakuerdo ku loke Luther a skirbi akinan òf no? Den klas, duna motibunan pa bo kontestanan. 9 / 9