Ora Konfliktonan Lanta Les 7 di kuartaal 4, aña 2018 Lesa pa e siman aki: Echonan 6:1-6; Echonan 10:1-23; Mat. 5:17-20; Echonan 11:3-24; Echonan 15:1-22; Amos 9:11,12. TEKSTO PRINSIPAL: "Pasobra boso tur, ku a wòrdu batisá den Kristu, a bisti boso mes ku Kristu. Awor no tin ni hudiu ni griego, no tin ni esklabo ni hende líber, no tin ni hòmber ni muhé; pasobra boso tur ta un den Kristu Hesus" (Galationan 3:27,28). Ora Konfliktonan Lanta sabbat, 10-11-2018 Un di e tareanan mas difísil di kualke komunidat Kristian ta pa mantené unidat ora ku diferensianan di opinion surgí riba asuntunan relashoná ku e identidat i mishon di e iglesia. E diferensianan aki por guia na konsekuensianan devastado. Awe e komunidatnan Kristian no ta diferente for di esnan ku nos ta mira den e Testament Nobo. Hende ta hende, i diferensianan, asta riba puntonan importante, lo bini. E promé Kristiannan a enfrentá algun konfliktonan ku a surgi for di prehuisionan interpersonal persibí i di diferensianan serio di interpretashonnan di historianan i práktikanan prinsipal di Testament Bieu. E konfliktonan aki por a destruí e iglesia den su komienso si no tabata pa apòstelnan i lidernan atento ku tabata buska e guiansa di e Spiritu Santu i e Skrituranan pa resolvé e tentashonnan aki. Un par di simannan pasa nos a studia kon e iglesia tempran a eksperensia e unidat di iglesia. E siman aki nos lo mira kon e iglesia tempran a resolvé e konfliktonan interior ku tabata debilitá su unidat i menasa su sobrebibensia. Kiko e konfliktonan aki tabata, kon nan a wòrdu resolvé, i kiko nos por siña for di e eksperensianan aki? Studia les di e siman aki pa prepará pa Sabat November 17. 1 / 7
Prehuisionan Etniko djadumingu, 11-11-2018 Lesa Echonan 6:1. Ki asuntu den e iglesia tempran ta kousa hende pa keha tokante e distribushon hustu i igual di kuminda na viudanan? Algun promé Kristiannan a parse di ta inhustu kontra e viudanan di herensia Griego meimei di nan i a proveé nan ku ménos kuminda ku e viuda nan di herensia Hebreo. E faboritismo persibí aki a kousa un kiebro den e promé komunidat di kreyentenan. Sea òf no ku e faboritismo tabata real, e versíkulo no ta bisa esei. E ta bisa solamente ku algun hende tabata kere ku e tabata asina. E konflikto aki tabata menasa e unidat di iglesia masha tempran. Kon fasinante ku divishon etniko a wòrdu mira asina pura den e iglesia. Lesa Echonan 6:2-6. Kiko tabata e pasonan simpel ku e iglesia tempran a tuma pa resolvé e mal komprondementu aki? E iglesia tempran tabata krese rápidamente, i e kresementu aki tabata trese karganan kada bes mas pisa riba e apòstelnan. E apuntamentu di e shete hòmbernan aki, tradishonalmente yama "diakononan" (ounke e Testament Nobo no tabata yama nan asina), a aliviá e tenshon den e iglesia di Herusalem i a permití e envolvimentu di mas hende den e ministerio di e iglesia. E apòstelnan tabata skucha kuidadosamente na e kehonan di kreyentenan di abla Griego i a pidi nan pa un solushon. E selekshon di e shete hòmber nan pa bira asosiadonan di e apòstelnan a wòrdu laga pa e grupo aki, i nan a rekomendá shete disipel, tur di nan for di herensia di abla Griego. E hòmbernan a wòrdu bisa di ta "di bon reputashon, yen di Spiritu Santu i di sabiduria" (Echonan 6:3,). E ministerio di e apòstelnan, kua te na e momento ei tabata tantu di prediká e Palabra di Dios i pa distribuí alimento na viudanan, a wòrdu dividí den dos grupo, kada unu hasiendo un ministerio igualmente di balor pa e proklamashon di e evangelio. Lukas a usa e mesun palabra "ministerio" òf "sirbishi" (diakonia), pa referí na tur dos ministerio di e apòstelnan den prediká e Palabra (Echonan 6:4) i na e ministerio di e diakononan den distribuí alimento (Echonan 6:1). Ki nifikashon bo ta mira den e echo, ku e lidernan a yama hopi di e kreyentenan huntu (Echonan,6:2) pa asina trata na haña un solushon? 2 / 7
E Kombershon di Paganonan djaluna, 12-11-2018 E kombershon di Paganonan na e evangelio di Kristu Hesus ta un evento den e buki di Echonan ku ta prepará e esenario pa e konfliktonan di mas grandi den e bida di e iglesia tempran, unu ku lo menasa su eksistensia i mishon. Lesa Echonan 10:1-23. Ki elementonan den e pasashi aki ta indiká ku e Spiritu Santo tabata obra den e kurasonnan di hopi hende pa prepará e kaminda pa Paganonan pa risibí e evangelio? E vishon mester a parse straño pa Pedro. El a wòrdu di shòk dor di esei, pasombra, komo un Hudiu fiel, nunka el a kome alimentunan impuro òf kontaminá, manera e lei ta rekerí (mira Levítiko 11, Ezk. 4:14, i Dan. 1:8 ). Sinembargo, e intento di e vishon aki no tabata tokante dieta pero tokante e bareranan entre Hudiunan i Paganonan i ku tabata stroba e plamamentu di e evangelio. Bareranan asina tabata por lo ménos mesun prevalente den e mundu antiguo manera nan ta awe. Den e promé dékadanan, Kristiandat tabata básikamente forma di Hudiunan ku a aseptá Hesus komo e Mesías primintí di e profesianan di e Testament Bieu. E promé kreyentenan aki den Hesus tabata Hudiu nan fiel ku tabata obedesé e lei manera nan a wòrdu siña. Nan no a konsiderá ku e evangelio di Hesus Kristu a kita òf abolí e preskripshon nan di Testament Bieu (mira Mat. 5:17-20 ). Lesa Echonan 10:28, 29, 34, 35. Kon Pedro a komprondé e nifikashon di e vishon ku el a rísibí na Jope? Kiko a gui'é na e interpretashon aki? Loke nos ta mira ta sosodé den Echonan ta ku e Spiritu Santu a prepará e kaminda pa Paganonan wòrdu risibí den e kompañerismo di e komunidat Kristian. I nan por a hasi esaki sin mester tabata sirkumsidá i bira Hudiu promé. Loke a kombensé Pedro i su amigunan ku berdaderamente esaki tabata Dios Su boluntat ta e dramamentu di e Spiritu Santu riba Cornelio i su kas den un manera similar na loke e disipelnan di Hesus a eksperensia riba e dia di Pentekostes (Echonan 10:44-47). Si e Spiritu Santu por wòrdu duna na e Paganonan den e mesun manera ku el a wòrdu duna na Hudiunan, e ora ei ta evidente ku wòrdu sirkumsidá no tabata un rekisito previo pa bira un kreyente den Hesus komo e Mesías. E konklushon aki a pone e esenario pa un konflikto teológiko mas grandi entre e promé Kristiannan. 3 / 7
E Spiritu Ta Guia djamars, 13-11-2018 Informenan di loke a sosodé na Cesarea ku Comelio pronto a yega na e lidernan di e komunidat Kristian na Herusalem, i nan a puntra Pedro pa duna kuenta di loke a sosodé. Nan a wòrdu ofendí dor di loke Pedro a hasi pa motibu ku di akuerdo ku nan komprondementu Hudiu di e Lei di Moises, Hudiunan fiel no tabata permití pa kome ku Paganonan (Echonan 11:3). Lesa Echonan 11:4-18. Kiko Pedro a bisa pa splika e obra di e Spiritu Santu i Su guiansa den e evento aki? Kiko tabata e punto prinsipal ku e ta hasiendo dor di konta di nobo loke a sosodé? Ounke algun a lanta preguntanan tokante e legitimidat di Pedro su akshonnan i su desishon pa batisá e Paganonan aki, sufisiente testigu nan (Echonan 11:12 ) a sertifiká ku e Spiritu Santu berdaderamente a manifestá Su presensia den e mesun manera ku na Pentekostes. E guiansa i orientashon di e Spiritu Santu den e kaso aki ta impenetrabel i e don rekonosé. "I ora nan a tende esaki, nan a kalma i a glorifiká Dios, bisando, 'Asina anto, Dios a duna e paganonan tambe e repentimentu ku ta guia na bida"' (Echonan 11:18,). Lesa Echonan 11:19-24. Kiko a pasa despues den e bida di e iglesia tempran? Podisé algun den Herusalem a pensa ku loke a sosodé ku Cornelio i su kas lo ta un eksepshon i ku tal eksperensia lo no wòrdu ripití. Pero esei no ta loke e Spiritu Santu tabata ke. Segun ku e disipelnan di Hesus tabata plama mas aya di Herusalem i Judea, pa motibu di e persekushon ku a lanta despues di Esteban su morto (Echonan 8:1 ), i a bai na Samaria, Fenisia, Cyprus i Antiokia, mas i mas Paganonan a aseptá Hesus komo nan Salbador. Esaki ta loke Hesus a predesi ( Echonan 1:8 ). Maravioso manera e fluho aki di Paganonan tabata, si nos pone nos mes den e lugá di e promé kreyentenan Hudiu no ta difísil pa mira kon nan no tabata sigur kon pa reakshoná. Kon nos mes lo por afera na puntonan di bista estrechó di e iglesia i di nos mensahe ku por impedí nos testimonio? 4 / 7
E Konsilio di Herusalem djarason, 14-11-2018 Lesa Echonan 15:1, 2 i Galationan 2:11-14. Kiko ta e dos asuntunan ku a kousa konflikto serio den e iglesia tempran? E menasa ku unidat di iglesia tabata enfrentá dor di e promé Kristian nan tabata real i difísil. Algun Kristiannan Hudiu tabata pensa ku salbashon tabata posibel solamente pa esnan ku tabata pertenesé na e pueblo di pakto di Dios, i esaki ta impliká ku sirkumsishon tabata un rekerimentu. I komo partí di un estilo di bida fiel, e kreyentenan aki Hudiu tambe tabata kere ku nan mester evitá tur sorto di kontakto ku Paganonan ku posiblemente por stroba nan propio salbashon. E Hudiunan tabatin tradishonnan masha estrikto respekto nan asosashonnan ku Paganonan. E tradishonnan aki rápidamente a kombertí den un piedra di trompeká pa e komunidat Kristian nobo ora ku e apostel nan a kuminsá saka man pa e Paganonan ku tabata deseá na bira siguidonan di Hesus. Pa motibu ku e Mesías ta e Salbador di Dios Su pueblo di pakto, manera a wòrdu predesi den e Tèstamènt Bieu, Paganonan no ta suponé di bira Hudiunan promé i despues sigui e mesun reglanan di pakto si nan ke ta salba? Lesa Echonan 15:3-22. Kiko ta algun asuntunan presentá durante e Konsilio di Herusalem? E asuntu aki tabatin rais den konfliktonan di interpretashonnan profundo di e historianan di Tèstamènt Bieu tokante sirkumsishon i relashon ku Paganonan. Manera apòstelnan, ansianonan, i delegadonan for di Antiokia a sinta huntu, ta parse ku e diskushon a sigui pa un tempu largu sin niun solushon. Pero e ora ei Pedro, Barnabas, i Pablo a duna nan spichnan. Pedro su spich tabata aludí na revelashon vishonario ku Dios a dun'é i na e don di e Spiritu Santu, kua a habri e kaminda pa e mishon na e Paganonan. E ora ei Pablo i Barnabas a kompartí nan historianan di loke Dios a hasi atraves di nan pa e Paganonan. Komo resultado, hopi bista a wòrdu habri pa bèrdat nobo. Pedro a bisa: " 'Ma nos ta kere ku nos ta salbá pa medio di e grasia di Señor Hesus, di e mesun manera ku nan tambe ta,' "es desir e Paganonan (Echonan 15:11,). Siglonan di tradishon nan antiguo tabata wòrdu deshasí den e lus di e evangelio. 5 / 7
Un Solushon Difísil djaweps, 15-11-2018 Sierto nivel di konfiansa a wòrdu rekerí for di e iglesia na Antiokia pa manda representantenan na Herusalem pa asina buska e mihó solushon pa nan konflikto. Sinembargo, despues di oranan di diskushon entre e apostelnan i ansianonan, Santiago, e ruman hòmber di Hesus, ku ta aparesé di ta e líder di e asamblea, a hasi un huisio tokante kiko mester wòrdu hasi (Echonan 15:13-20). Klaramente e konsilio a disidí ku Paganonan no tin mester di bira kombertinan Hudiu, obedesiendo tur aspektonan di e lei seremonial, inkluyendo sirkumsishon, pa por bira Krístiannan. Lesa Amos 9:11, 12 i Jeremias 12:14-16. Ki predikshonnan e profeta nan aki di Testament Bieu a hasi respekto e nashonnan bisiña di Israel? Miéntras ku Santiago tabata sita for di Amos 9, nos ta mira alushonnan na e salbashon di e nashonnan den otro profetanan di Testament Bieu. Tabata intenshon di Dios tur tempu pa salba mundu kompletu atraves di Israel su testimonio i eksperensia. De echo, Dios Su yamada na Abraham tabata inkluí un bendishon pa tur nashon atraves di dje i su desendientenan (Gen. 12:1-3). E guiansa di e Spiritu Santu; e ministerio di Pedro, Barnabas, i Pablo entre e Paganonan; i e kombershon di hopi Paganonan tabata evidensianan ku no por wòrdu pone un banda. E testimonionan aki a yuda lidernan di e komunidat Kristian na Herusalem realisá ku hopi profesia di Testament Bieu awor ta kumpliendo. De echo, Dios ya kaba a duna leinan guiando e presensia di Paganonan den Israel i ki restrikshonnan tabata apliká na nan (Levítiko 17, 18). Santiago tambe ta referí na e leinan aki den su desishon (Echonan 15:29). A bira opvio pa tur hende ku Dios tabata yama Paganonan pa djoin Su pueblo i risibí salbashon den Hesus. E guiansa di e Spiritu Santu a duna nan un komprondementu mas profundo di e Skritura i a revelá na nan berdatnan krusial ku nan no a yega di mira promé. Echonan 15:30-35 ta bisa nos di e kontesta di e kreyentenan na Antiokia riba loke a wòrdu disidí na Herusalem: "Nan a regosihá pa motibu di e enkurashamentu den dje" (Echonan 15:31). Nos ta mira aki den Echonan un ehempel poderoso di kon e iglesia tempran, atraves di sumishon na e Palabra di Dios, huntu ku un mentalidat di amor, unidat, i konfiansa, por bou di e guiansa di e Spiritu Santu ta evitá loke por tabata un krísis grandi di unidat. Kiko e historia aki ta siña nos tokante kon importante e ta pa nos, no solamente pa skucha na, loke otronan ta bisando pero pa konsiderá ku nan por ta korekto, asta ora loke nan ta bisa no ta eksaktamente loke nos ke tende? 6 / 7
Powered by TCPDF (www.tcpdf.org) Mas Estudio: djabierne, 16-11-2018 Ellen G. White, "Un Buskadó di Berdat," pp. 131-142; "Hudiu i Pagano;'pp. 188-200, den The Acts of the Apostles. "E konsilio ku a disidí e kaso aki tabata komponé di apòstelnan i maestronan ku tabata prominente den lanta e iglesianan Hudiu i Pagano, ku delegadonan skohí for di varios lugánan. Ansianonan for di Herusalem i diputadonan for di Antiokia tabata presente, i e iglesianan di mas influensia tabata representá. E konsilio a move di akuerdo ku e diktadonan di huisio bon informá, i ku e dignidat di un iglesia establesé dor di boluntat divino. Komo resultado di nan deliberashonnan nan tur a mira ku ta Dios Mes a kontesta e pregunta en kuestion dor di otorgá na e Paganonan, e Spiritu Santu; i nan a realisá ku tabata nan parti pa sigui e guiansa di e Spiritu. "E kurpa kompletu di Kristiannan no a wòrdu yama pa vota riba e kuestion. E 'apòstelnan i ansianonan,' hòmbernan di influensia i huisio, a plania i publiká e dekreto, kua tabata despues di esei generalmente aseptá dor di e iglesianan Kristian. No tur, sinembargo, tabata komplasé ku e desishon; tabatin un grupo di rumannan ambisioso i sigur di nan mes ku no tabata di akuerdo. Ta asumí ku e hòmbernan aki a partisipá riba nan propio responsabilidat. Nan a wòrdu permití pa murmurá i krítika, proponiendo plannan nobo i buska pa redusí e trabou di hòmbernan kua Dios a ordená pa siña e mensahe di evangelio. For di promé e iglesia tabatin e tipo di opstákulonan pa kumpli i lo tin semper te na fin di tempu."-ellen G. White, The Acts of the Apostles, pp. 196, 197. Preguntanan pa Diskushon: 1. Ki pasonan pa ku e resolushon di konfliktonan haña den e historia ku nos a mira di e siman aki por wòrdu apliká na bo komunidat di iglesia si desakuerdo surgi? Ounke ku e asuntu ku e iglesia tabata dil ku n'e aki tabata teológiko, kiko nos por siña for di e historianan ku por yuda e iglesia ora ku asuntunan kultural, polítiko, of etniko ta menasa e unidat? Ki prinsipio importante nos por tuma for di loke nos a mira? 2. Mira atrobe na e sita di Ellen G. White ariba. Apesar di e resultado, algun ainda no tabata satisfecho. Ki les nos mester tuma for di realidat tristu aki? 7 / 7