Ofrendanan di Gratitut Les 9 di kuartaal 1, aña 2018 Lesa pa e siman aki: Mat. 6:19-21; Efe. 2:8; 1 Ped. 4:10; Lukas 7:37-47; 2 Kor 8:8-15; 2 Kor 9:6, 7. TEKSTO PRINSIPAL: "Pasobra Dios a stima mundu asina tantu, ku El a duna Su Yu unigénito, pa ken ku kere den dje no bai pèrdi, ma tin bida etèrno" (Huan 3:16). Ofrendanan di Gratitut sabbat, 24-02-2018 Nos Dios ta un Dios ku ta gusta duna; e gran bèrdat aki ta ser mirá na un manera mas poderoso den e sakrifisio di Hesus. "Pasobra Dios a stima mundu asina tantu, ku El a duna Su Yu unigénito, pa ken ku kere den dje no bai pèrdi, ma tin bida etèrno" (Huan 3:16). Òf den e vèrsikulo aki: " `Si boso anto, siendo malbado, sa di duna kosnan bon na boso yunan, kuantu mas boso Tata selestial lo duna e Spiritu Santu na esnan ku pidi'é!' " (Lukas 11:13). Dios ta duna i duna; ta Su karakter. Pues, nos ku ta purba na reflehá e karakter ei mester duna tambe. Ta duru pa imaginá un kontradikshon den tèrminonan di esun di un "Kristian egoista:' Un manera pa duna bèk loke a ser duná na nos ta pa medio di ofrendanan. Nos ofrendanan ta presentá un oportunidat pa ekspresá gratitut i amor. Riba e dia ku Hesus ta duna e redeminan bonbini den shelu, nos lo mira esnan ku a aseptá Su grasia, i lo realisá ku eseptashonnan ei a ser hasi posibel pa medio di nos ofrendanan di sakrifisio. E siman aki nos lo wak e aspektonan importante di ofrenda. Dunamentu generosamente, sea ta for di rekursonan, tempu òf talento, ta un medio poderoso di biba nos fe i revelá e karakter di Dios Kende nos ta sirbi. Studia e lès di e siman aki pa prepará pa Sabat, 3 di mart. 1 / 7
"Kaminda Boso Tesoro Ta" djadumingu, 25-02-2018 Lesa Mateo 6:19-21. Maske ku nos konosé e vèrsikulonan aki asina bon, kon nos por ta liber di e gara poderoso ku tesoronan terenal por tin riba nos? Wak Kol. 3:1, 2. " `Pasobra kaminda boso tesoro ta, einan boso kurason lo ta tambe' " (Mat. 6:21) ta un yamada di Hesus. E magnitut kompleto di e sita aki por ser mirá for di e promé dos vèrsikulonan, ku ta kontradesi wardamentu di nos tesoronan riba tera ku wardamentu di nan den shelu. Tres palabra ta deskribi tera: mòt, frustu i ladron (wak Mat. 6:19), di kua tur ta impliká kon temporal i pasahero nos tesoro terenal ta. Ken no a siña kon rapido kosnan terenal por disparsé? "Riba tera tur kos ta instabil, inkonsistente i insigur; tur kos por ser dekai, destrui, hortá i pèrdi. Shelu ta net kontrali: tur kos ta etèrno, duradero, sigur i no ta peresé. Den shelu no tin pèrdida" C. Adelina Alexe, "Kaminda Bo Kurason ta Pertenesé," den Beyond Blessings, edita pa Nikolaus Satelmajer, (Nampa, Idaho: Pacific Press Publishing Association, 2013), pg. 22. Wak bo pertenenshanan. Asta si bo tin solamente hopi tiki, tardi òf trempan mayoria di nan to ser tirá afo. E eksepshon lo por ta algu ku bo a eredá. Pero un mayordomo sabí mester soru pa pone tesoronan den shelu pa nan keda bon. Einan, no manera akinan, bo no mester preokupá ku bankarota, ladron òf hendenan ku ta plunder kos. Mateo 6:19-21 ta kontené un di e konseptonan di mas importante riba mayordomia. Bo tesoro ta trek, hala, persuadi, demandá, atraé i deseá di kontrolá bo kurason. Den e mundu material, bo kurason ta sigui bo tesoro, pues kaminda bo tesoro ta ta keda vitalmente importante. Mas nos enfoká riba nesesidat i ganashinan terenal, mas difisil ta pa pensa riba kosnan selestial. Pa profesá di ta kere den Dios pero ta keda ku nos tesoronan aki riba tera ta hipokresia. Nos akshonnan mester bai di akuerdo ku nos palabranan. Den otro palabra, nos ta mira nos tesoronan riba tera ku bista, pero nos mester mira nos ofrendanan komo tesoronan den shelu pa medio di fe (2 Kor 5:7). Maske ku nos, logikamente, mester proveé pa nos nesesidatnan (asta penshun), ta krusial pa semper nos keda ku e kuadro grandi, kual ta eternidat, den mente. Lesa Hebreonan 10:34. Kua punto importante Pablo ta hasiendo akinan tokante di e kontraste entre tesoro riba tera i tesoro den shelu? 2 / 7
Mayordomonan di e Grasia di Dios djaluna, 26-02-2018 Kiko, segun Efesionan 2:8, ta algu mas ku Dios a duna na nos? Grasia ta "un fabor inmeresi." E ta un regalo ku bo no ta meresé. Dios a basha Su grasia riba e planeta aki i, si nos simplemente keda sin ninga esaki, Su grasia lo alkansá nos akibou i transformá nos bida, awor i pa eternidat. Tur e rikesa i poder di shelu ta ekipá den e regalo di grasia (2 Kor: 8:9). Asta angelnan ta asombrá pa e gran regalo aki (1 Ped. 1:12). No tin duda: di tur loke ku Dios ta duna na nos, e grasia duná na nos den Kristu Hesus ta e regalo di mas presioso di tur. Sin grasia, nos lo ta sin speransa. Piká su impakto tristu riba humanidat ta muchu grandi pa humanonan por libra nan mes di dje un dia. Asta obedensia na Dios Su lei lo no por duna nos bida. "Lei ta kontrario anto na e promesanan di Dios? Di ningen manera! Pasobra si a wòrdu duná un lei ku tabata por a duna bida, e ora ei di bèrdat hustisia lo a wòrdu basá riba lei" (Gal. 3:21). Finalmente, si kualkier lei por a salba nos, lo tabata Dios Su lei. Pero Pablo ta bisa ku asta esei no por salba nos. si nos mester wòrdu salbá, lo e mester ta pa medio di grasia. Lesa 1 Pedro 4:10. Kon mayordomia ta relashoná ku grasia? Splika kon ora nos duna na Dios i na otronan esaki ta mustra Su grasia. Pedro a bisa ku manera nos a risibi e regalo di Dios Su grasia, nos mester ta "mayordomonan di e grasia multiforme di Dios" (1 Ped. 4:10) bèk. Esei ta nifiká, Dios a duna nos regalonan; p'esei, nos mester duna bèk for di loke a ser duná na nos. Loke nos a risibi, pa grasia, no ta pa komplasé i benefisiá nos mes, pero pa e avanse di e evangelio. Pornada nos a haña (kual ta loke grasia ta realmente); pornada nos tinku duna tur manera ku nos por. Pensa riba tur e kosnan ku Dios a yega di dunabo. Den kua manera abo por ta un mayordomo di e grasia ku a ser duná gratuitamente na bo? 3 / 7
Nos Mihó Ofrenda djamars, 27-02-2018 Lesa Lukas 7:37-47. Kiko e historia aki ta siña nos tokante di e motivashon apropiá pa ofrendanan pa Dios? Maria a drenta e kamber i a mira Hesus sosegá na e mesa. El a kibra e butishi di alabaster ku perfume di gran balor i a bash'e riba dje. Algun a pensa ku su echo tabata inapropiá, konsiderando ku e bida ku e tabata biba tabata ilisito. Pero Maria a ser librá for di ta poseé pa demoño (Lukas 8:2). E ora ei, despues di a mira e resurekshon di Lazaro, el a bira kargá ku gratitut. Su perfume tabata e pertenensha di mas balioso ku e tabatin, i esaki tabata su manera di mustra su gratitut na Hesus. E historia aki ta kapturá loke realmente mester ta nos motivashon ora di duna ofrenda: gratitut. Finalmente, kua otro kontesta nos mester tin pa e regalo inpagabel di e grasia di Dios? Su generosidat tambe ta hiba nos na duna, i ora esaki ta uni ku nos gratitut, tur dos ta forma e ingredientenan di ofrendanan signifikativo, inkluso nos tempu, talentonan, tesoronan i kurpa. Lesa Eksodo 34:26, Levitiko 22:19-24 i Numbernan 18:29. Maske e konteksto ta kompletamente diferente for di awe, kua prinsipio nos por saka for di e tekstonan aki pa loke ta trata nos ofrendanan? Nos mihó ofrendanan por parse insufisiente den nos bista, pero nan ta signifkante den bista di Dios. Dunando Dios e mihó ta mustra ku nos ta pone E na promé lugá den nos bida. Nos no ta duna ofrenda pa por risibi fabor; na lugá di esei, nos ta duna loke nos tin pa motibu di gratitut pa loke a ser duná na nos den Kristu Hesus. "Devoshon i generosidat kompleto, impulsá pa amor agradesido, lo hiba na e ofrenda di mas chikitu, e sakrifisio boluntario, un fragransia divino, hasiendo e regalo di un balor inpagabel. Pero, despues ku boluntariamente nos someté na nos Redentor tur loke ku ta di nos, sea e ta algu asina balioso pa nos, si nos mira nos debe di gratitut pa Dios manera e ta realmente, tur loke nos to por a ofresé lo parse di ta insufisiente i pober den nos bista. Pero angelnan ta tuma e ofrendanan aki, ku pa nos ta mustra pober, i ta presentá nan komo un ofrenda di holó dushi dilanti di e trono, i nan ta ser aseptá." Ellen G. White, Testimonies, for the Church, vol. 3, p. 397. 4 / 7
E Intenshonnan di e Kurason djarason, 28-02-2018 Den un lès anterior nos a mustra e historia di e biuda su ofrenda generoso. Maske e ta chikitu den komparashon ku e otro ofrendanan, e tabata generoso pasobra el a mustra e bèrdadero naturalesa di su karakter i kurason, kual a pone Hesus busa, " `E biuda pober aki a tira mas tantu aden ku nan tur' " (Lukas 21:3). Dios so (Santiago 4:12) konosé nos bèrdadero intenshonnan (Prov. 16:2; wak 1 Kor 4:5 tambe). Ta posibel pa tin e akshonnan korekto ku e intenshonnan robes. Pa duna abundansia no ta rekeri hopi fe, pero pa duna sakrifikando pa e bienestar di otronan por realmente bisa algu hopi poderoso tokante di nos kurason. Lesa 2 Korintionan 8:8-15. Kiko Pablo ta papiando di dje akinan pa loke ta trata e dunamentu i e intenshonnan tras di e dunamentu? Kua prinsipionan nos por saka for di e vèrsikulonan aki tokante di mayordomia? Kiko ku bo intenshon pa kua bo ta duna por ta, ta un kontinuidat ta bai di ego pa generosidat. E lucha pa e kontinuidat aki entre egoismo i dunamentu ta ser bringá mas frekuente ku kualkier otro don spiritual. Egoismo lo fria e kurason ku un tempu tabata na kandela pa Dios. E problema ta bini ora ku nos laga egoismo drenta den nos eksperensha Kristian. Pues, nos ta haña maneranan pa hustifka nos egoismo i hasié den e nòmber di Kristu. E punto final ta un palabra: amor. I amor no por ser manifestá sin apnegashon, un boluntat pa duna di bo mes, asta sakrifikando, pa e bieniestar di otronan. Amenos ku Dios Su amor no ta ser reflehá den nos bida, nos dunamentu lo no reflehá Dios Su amor. Un kurason egoista tin tendensha di stima su mes so. Nos mester pidi Señor pa " `sirkumsidá e prepusio di [nos] kurason' " (Deut. 10:16) pa asina nos por siña pa stima manera nos a ser stimá. Amor, e base di tur bèrdadero generosidat, ta kapturá e suma di tur generosidat Kristian. Dios Su amor dirigi na nos ta inspirá nos pa stima bek, i realmente e ta e intenshon supremo pa duna. Kiko tin di malu den un ofrenda boluntario duná mas ku un sentido di obligashon ku un sentido di amor? 5 / 7
E Eksperensha di Duna djaweps, 01-03-2018 Si Kristu a bini pa revelá na nos e karakter di Dios, un kos mester ta bon kla awor aki: Dios ta stima nos, i E ke solamente lo mehor pa nos. E ta pidi nos pa hasi solamente loke lo por ta pa nos propio benefisio, nunka algu na nos desventaha. Esaki lo inklui Su yamada tambe pa nos por ta generoso i dunadonan gososo di loke a ser duná na nos. E ofrendanan di boluntat propio i generoso ku nos ta duna ta di mesun benefisio na nos, ku ta e dunadónan, ku nan ta pa esnan ku ta risibi nan. Solamente esnan ku duna di e manera aki por sa pa nan mes kuantu mas bendishoná ta pa duna ku pa risibi. Lesa 2 Korintionan 9: 6, 7. Kon e vèrsikulonan aki ta duna un kapsula di kiko dunamentu mester enserá? Dunando un ofrenda generoso por i mester ta un akto hopi personal i spiritual. E ta un obra di fe, i un ekspreshon di gratitut pa loke a ser duná na nos den Kristu. I meskos ku kualkier akto di fe, dunamentu solamente ta oumentá fe, pasobra "fe sin obra ta morto" (Santiago 2:20). I no tin mihó manera pa oumentá fe ku pa biba nos fe, kual ta nifiká pa hasi kosnan ku ta krese pa motibu di nos fe, kosnan ku ta floresé pa su motibu. Mientras nos ta duna, boluntariamente i generosamente, den nos propio manera nos ta reflehando e karakter di Kristu. Nos ta siñando mas tokante di kon Dios ta ora nos eksperensh'e den nos propio aktonan. Pues, dunamentu di e manera aki solamente ta konstrui konfiansa den Dios i e oportunidat pa "purba i mira ku Señor ta bon; bendishoná ta e hende ku ta tuma refugio den dje!" (Sal. 34:8). "Lo ta bisto ku e gloria ku ta bria den e kara di Hesus ta e gloria di un amor di apnegashon. Den e lus di kalvario e lo por ser mirá ku e lei di amor ku ta ninga su mes ta e lei di bida pa tera i shelu; ku e amor ku `no ta buska pa su mes' ta bini for di e kurason di Dios; i ku den Esun mansu i humilde, e karakter di dje ku ta biba den e lus kaminda niun hende por yega ta ser manifestá." Ellen G. White, The Desire of Ages, pg. 20. Den ki manera bo a yega di eksperenshá e realidat di kon fe ta krese pa medio di dunamentu boluntario i generosamente for di loke a ser duná na bo? 6 / 7
Powered by TCPDF (www.tcpdf.org) Pensamentu Mas Profundo: djabierne, 02-03-2018 "E spiritu di generosidat ta e spiritu di Shelu. E spiritu di egoismo ta e spiritu di Satanas. Kristu su amor di sakrifsio propio ta ser revelá riba e krus. El a duna tur di loke E tabatin, i despues a duna Su mes, pa hende por ta salbá. E krus di Kristu ta yama na e generosidat di kada siguidor di e bendito Salbador. E prinsipio ilustrá einan ta pa duna, duna. Esaki hibá den generosidat aktual i bon obranan ta e bèrdadero fruta di un bida Kristian. E prinspio di mundu ta pa haña, haña, i asina spera di sigurá felisidat; pero e fruta di esaki ta miseria i morto." Ellen G. White, den Advent Review and Sabbath Herald, 17 di okt. 1882. Preguntanan di Diskushon: 1. Kiko ta e kos di egoismo ku ta hasié asina kontrali na e spiritu di Kristu? Kua ta algun kosnan konsiente ku nos por hasi pa yuda protehá nos mes for di un aktitut natural asina di e hende kaí? 2. "Laga kada un hasi manera el a propone den su kurason; no kontra su gustu òf obligá; pasobra Dios ta stima esun ku ta duna ku alegria" (2 Kor. 9:7). E palabra griego tradusí pa "ku alegria" ta paresé solamente un bia den e Tèstamènt Nobo i e ta e palabra for di kua nos ta haña e palabra ingles "hilarious" (masha prèt). Kiko esei mester bisa nos tokante di nos aktitut ora ku nos ta duna? 3. Traha un lista di tur e kosnan ku bo a yega di haña den Kristu. Hasi orashon tokante loke bo skirbi. Kiko e lista aki mester siña nos tokante di kon nos mester duna mirando kiko a ser duná na nos? Na mesun momenta, kiko bo lista ta siñabo tokante di kon asta nos mihó regalonan, duná ku e mihó intenshonnan, por parse asina miserabel den bista di loke nos a risibi? 4. Dikon egoismo ta un manera garantisá pa hasi bo mes miserabel? 5. Pensa riba un hende den bo famia di iglesia awor aki ku ta den un tipo di nesesidat. Kiko bo por hasi, awor aki mes, ku por yuda ministrá na e persona of personanan aki? Kiko bo por hasi, maske si e ta rekerí un sakrifisio doloroso di bo parti? 7 / 7