E Hábitonan di un Mayordomo Les 12 di kuartaal 1, aña 2018 Lesa pa e siman aki: Efe. 5:15-17, Kol. 3:23, Lukas 12:35-48, San. 4:14, Ech. 3:21, 1 Kor. 9:24-27. TEKSTO PRINSIPAL: "Kon un hoben por tene su kaminda puru? Dor di mantené esei segun Bo palabra. Ku henter mi kurason mi a buskabo; no lagami desviá for di Bo mandamentunan. Bo pala- bra mi a skonde den mi kurason, pa mi no peka kontra Bo" (Salmo 119:9-11). E Hábitonan di un Mayordomo sabbat, 17-03-2018 Bo hábitonan ta revelá e propósito i direkshon di bo bida. Mayordomonan ku ta desaroyá bon hábitonan ta e mayordomonan di mas fiel. Daniel tabatin un hábito di orashon diario (Dan. 6:10). Pablo su kustumber tabata pa ta den sinagoga (Ech. 17:1, 2). Tambe el a skirbi: "No laga hende gaña boso: `Mal kompania ta daña bon kustumber.' " (1 Kor 15:33). Nos mester kultivá bon hábitonan pa nos por remplasá esnan malu. "Nos lo ta, pa awor aki i pa eternidat, loke nos hábitonan hasi nos e bida di esnan ku ta forma hábitonan korekto, i ku ta fiel den ehekushon di kada deber, lo ta manera lusnan briante, dunando rayonan di lus riba e kaminda di otronan." Ellen G. White, Testimonies for the Church, vol. 4, pg. 452. E kaminda ku un hábito ta krea ta e kaminda di mas lihé ku bo por tuma pa haña e rekompensa ku bo ta buska. Un hábito ta un desishon bon fundá. Den otro palabra, bo no ni mester pensa riba dje; simplemente bo ta hasié. E hábito ei por ta hopi bon òf hopi malu, dependiendo di kiko e ta pa bo. E siman aki nos ta mira na hábitonan poderoso ku lo yuda un mayordomo kondusi e negoshi di Dios. Studia e lès di e siman aki pa prepará pa Sabat, 24 di mart. 1 / 7
Hábito: Buska Dios Promé djadumingu, 18-03-2018 Nos tur tin hábitonan. E pregunta ta: Ki tipo nan ta? Bon òf malu? Di tur e bon hábitonan ku un Kristian por tin, buska Dios promé kos kada dia lo mester ta esun di mas importante di tur. "Kada mainta dediká bo mes, alma, kurpa i spiritu na Dios. Stablesé hábitonan di devoshon i konfiansa mas i mas den bo Salbador.' Ellen G. White, Mind, Character, and Personality, vol. 1, pg. 15. Ku un hábito asina, siguramente nos lo drenta den e " `porta... smal"' ku ta hiba na bida (Mat. 7:14). Dios a bisa, " `Bo no mag di tin otro dios Mi dilanti' " (Eks. 20:3). Hesus a bisa, den e konteksto di nos nesesidatnan básiko, pa " `Buska promé e reino di Dios i Su hustisia' " (Mat. 6:33), i tambe a ser bisá na nos: " `I boso lo buskami i hañami, ora boso buskami ku henter boso kurason' " (Jer 29:13). Lesa Mateo 22:37, 38; Echonan 17:28; Efesionan 5:15-17; i Kolosensenan 3:23. Kiko ta ser bisá akina ku por yuda nos pa komprondé kon pa pone Dios promé den nos bida? Di tur nos ehèmpelnan di buska Señor promé, logikamente niun no ta mihó ku e ehèmpel di Hesus. Hesus a pone Su Tata promé den tur kos. Nos ta kuminsá mira e prioridat aki den Su bishita di Pasku na Herusalèm komo un mucha. Ora el a ser konfrontá pa Su mama, ku a hañ'e "den tèmpel," El a bisa Su mama, " `Mi mester tabata den e kas di Mi Tata' " (Lukas 2:46, 49). Atraves di Su bida, Hesus a anhelá na komunion ku Su Tata, manera por mira evidensia den Su bida di orashon. E hábito aki tabata algu ku e disipelnan no a komprondé kompletamente. Tur e podernan di skuridat no por a separá Hesus for di e Tata, pasobra Hesus a hasi e mantenshon di un konekshon total ku Su Tata un hábito. Nos por sigui Hesus Su ehèmpel tumando e desishon pa stima Dios ku tur kos kurason, mente i alma (Mat. 22:37). Hasiendo orashon, studiando Dios Su palabra i buskando pa imitá e karakter di Hesus den tur loke nos ta hasi, nos lo forma e hábito di pone Dios promé den nos bida. I pa un Kristian, kua hábito por ta mihó ku esaki? Puntra bo mes: Realmente mi a pone Dios na promé lugá den mi bida? Kon bo por sa? 2 / 7
Hábito: Spera riba e Regreso di Hesus djaluna, 19-03-2018 Lesa Lukas 12:35-48. Kiko e parábolá aki ta siña nos tokante di kon nos mester relashoná ku e segundo binida di Hesus? Dikon tur loke nos ta hasi semper mester ta den konteksto ku e realidat di e segundo binida? Mayordomia mester ser praktiká ku Hesus Su regreso den mente. E karakter di mayordomonan infiel ku ta aktua manera esnan fiel, eventualmente lo ser mustrá pa medio di nan aktonan; pasobra bèr- dadero i fiel mayordomonan ta ehekutá nan responsabilidatnan dor di pèrkurá i traha manera kos ku e Maestro ta presente. Nan ta biba pa e futuro i ta traha fielmente dia tras dia. "Ma nos siudadania ta den shelu, for di unda nos ta spera ansiosamente pa un Salbador, e Señor Hesu-Kristu" (Fil. 3:20). Abraham a buska un suidat etèrno (Heb. 11:10), i Pablo a buska Kristu Su regreso (Heb. 10:25). Nan tabata personanan ku ta pensa, antisipá i plania delantá, i tabata kla pa topa ku Hesus den kualkier momentu. Nos tambe mester desaroyá e hábito aki di anhelá ku un bista firme pa e klimaks di e evangelio (Tito 2:13). Na lugá di tir'un bista de bes en kuando òf djis wak e profesianan, nos mester ta mira, wak i hasi kontinuamente, semper na altura di e eternidat ku ta spera nos ora ku Kristu bini bèk. Na e mesun momentu, nos mester evitá spekulashonnan bunita tokante di eventonan di ultimo tempu. E promesa di e segundo binida ta duna nos guiansa den nos bida, ta proveé un perspektiva adekuá di presente i ta yuda nos pa kòrda kiko ta importante den bida. E hábito di anhelá pa e regreso di Hesus ta duna un mayordomo definishon i propósito. E krus a habri kaminda pa nos por tin un sita ku e Redentor. Nos ta buska klavenan revelá den Skritura ku ta mustra nos na e binida di Kristu den e gloria di e Tata i angelnan (Marko 8:38). "Mientras ku nos no ta wak e kosnan ku ta wòrdu mirá, ma e kosnan ku no ta wòrdu mirá. Pasobra e kosnan ku ta wòrdu mirá ta temporal, ma e kosnan ku no ta wòrdu mirá ta etèrno" (2 Kor 4:18). Si, morto i e presente realidat di morto, semper mester yuda nos realisá simplemente kon limitá i pasahero nos tempu akinan ta. Pero e promesa di e segundo binida tambe ta mustra nos ku morto riba su mes ta temporal i pasahero. P'esei, anto, nos mester biba ku e promesa di Kristu Su regreso den mente, un promesa ku mester impaktá e manera ku kada mayordomo Kristian ta biba. Laga nos hasi komo hábito awor pa biba semper den e ekspektativa di Kristu Su regreso. Nos nòmber mes ta revelá e realidat di e ekspektativa ei. 3 / 7
Hábito: Usa Tempu na un Manera Sabí djamars, 20-03-2018 " `Pasobra nos ta solamente di ayera i no sa nada, pasobra nos dianan riba tera ta manera un sombra' " (Job 8:9). Bo por para e oloshi, pero no e moveshon di tempu. Tempu no ta warda; e ta sigui move pa dilanti asta si nos para ketu i no ta hasi nada. Kiko e siguiente vèrsikulonan aki ta siña nos tokante di nos tempu akinan riba tera den e bida aki? San. 4:14; Sal. 90:10, 12; Sal. 39:4, 5; Ekl. 3:6-8. Kua ta e mensahe básiko ku nos mester saka for di e vèrsikulonan aki tokante di kon presioso nos tempu akinan ta? Ku algu asina limitá i ku no por bini bèk manera tempu, ta importante pa Kristiannan por ta bon mayordomonan di dje. Pues nos mester desaroyá e hábito di usa nos tempu na un manera sabi enfokando riba loke ta importante den e bida aki i esun siguiente. Nos mester manehá tempu basá riba loke e Palabra di Dios ta revelá na nos komo importante, pasobra unabes ku tempu kaba, no por ser renobá. Si nos pèrdé sèn nos por hañ'e bèk eventualmente, kisas asta mas di loke nos a pèrdé promé. Ku tempu si no ta asina. Un momentu pèrdi ta un momentu pèrdi pa semper. Ta mas fasil pa nos pone un webu kibrá bèk den su kaska ku rekapturá maske ta un pida momentu di pasado. Pues, tempu ta un di e komodidatnan mas presioso ku Dios a duna na nos. Kon importante ta, pues, pa nos desaroyá e hábito di hasi lo maksimo di kada momentu ku a ser duná na nos. "Nos tempu ta pertenesé na Dios. Kada momentu ta di dje, i nos ta bou di e obligashon di mas solemne pa mehorá esaki na Su gloria. Lo E no rekerí kuenta i rason mas estrikto di niun otro talento manera esun di nos tempu. "E balor di tempu ta mas leu di komputashon. Kristu a konsiderá kada momentu komo presioso, i asina nos tambe mester konsiderá nan. Bida ta muchu kòrtiku pa nos hasi mal uso di dje. Nos tin solamente un par di dia di probashon den kua nos mester prepará pa eternidat. Nos no tin tempu di pèrdé, tempu pa pasa den plasernan egoista, ni tempu pa e indulgensia di piká." Ellen G. White, Christ's Object Lessons, pg. 342. "P'esei, mira bon kon boso ta kana, no manera hende bobo, ma manera hende sabi, hasiendo bon uzo di boso tempu, pasobra e dianan ta malu" (Efe. 5:15, 16). Kiko Pablo ta bisando nos akinan, i kon nos por apliká e palabranan aki na e situashon presente? 4 / 7
Hábito: Mantené un Mente, Kurpa i Alma Sano djarason, 21-03-2018 Originalmente nos a ser kreá perfektamente mentalmente, fisikamente i spiritualmente. Logikamente, piká a daña tur kos. E bon notisia di e evangelio, entre otro kosnan, ta ku Dios ta den e proseso di restourá nos na loke nos a ser kreá pa ta originalmente. Lesa Echonan 3:21 i Revelashon 21:1-5. Kua speransa ta ser hañá den e vèrsikulonan aki pa nos? Kon nos mester biba mientras nos ta warda e restourashon final aki? Kristu a traha inkansablemente, mientras E tabata akinan, pa e edifikashon di humanidat su parti spiritual, mental i fisiko, tur esakinan komo preparashon pa e restaurashon final na e fin di tempu. Hesu Su ministerio di kurashon ta prueba ku Dios ke pa nos ta salí te kaminda ta posibel awor te ora ku fin yega. Pues mayordomonan ta desaroyá hábitonan pa nan mente, kurpa i alma ku ta promové estilo di bida saludabel. Na promé lugá, e mente lo krese mas fuerte mientras e ta ser usá. Kontinuamente yena bo mente ku "tur loke ta bèrdadero, tur loke ta onorabel, tur loke ta hustu, tur loke ta puru, tur loke ta bunita, tur loke ta di bon fama" (Fil. 4:8). Pensamentunan asina ta trese pas (Isa. 26:3), i un "kurason trankil ta bida pa e kurpa" (Prow 14:30). Hábitonan saludabel di e mente ta pèrmiti e toren di poder pa funshoná den e mihó kondishon posibel. Na di dos lugá, bon hábitonan saludabel, manera un ehersisio i dieta apropiá, ta indiká ku nos ta kuida nos mes. Ehersisio, por ehèmpel, ta baha strès i preshon di sanger, mehorá nos humor i e ta un remedi ku probablemente ta evitá embehesimentu mas ku kualke kos disponibel den rèki. Na di tres lugá, un mayordomo lo desaroyá bon hábitonan pa duna vigor na e alma. Halsa bo alma na Dios (Sal. 86:4, 5) i spera (Sal. 62:5). Bo alma lo prosperá mientras "bo ta kanando den bèrdat" (3 Huan 3) i lo ta "preservá kompleto, sin kulpa na e binida di nos Senor Hesu-Kristu" (1 Tes. 5:23). Pensa riba e tipo di hábitonan ku bo tin i kon nan ta impaktá bo salú spiritual, fisiko i mental. Tin algun kambionan ku bo mester hasi ku por yudabo mehorá den kualkier òf tur e areanan aki? Kua eskoho bo por tuma i kua promesanan di Beibel bo por reklamá ku por yudabo mehorá e kalidat di bo bida awor mientras bo ta warda bo restorashon final? 5 / 7
Hábito: Sano Huisio djaweps, 22-03-2018 Sano huisio ta un di e karakteristikanan mas importante ku un mayordomo por tin den su karakter. "Pasobra Dios no a duna nos un spiritu di temor, sino di poder i di amor i di sano huisio" (2 Tim. 1:7). E palabra griego pa disiplina, sophronismos, ta bini dilanti solamente akinan den e vèrsikulo aki di Tèstamènt Nobo i ta embolbi e abilidat pa hasi loke mester ser hasi ku un mente balansá i sano ku lo no desviá for di Dios Su prinsipionan. Sano huisio por yuda nos pa "diserní loke ta bon i loke ta malu" (Heb. 5:14), komprondé situashonnan presente i tòg na un manera suave i kalmo, resistí preshonnan i distraishonnan apesar di e resultado. Daniel a sigui loke tabata korekto apesar di e leonnan, kontrali na Samson, kende a biba un bida egoista i a mustra tiki dominio òf sano huisio. Hosé a sigui loke tabata korekto den kas di Potifar, kontrali na Salomon, kende a adorá otro diosnan (1 Reinan 11:4, 5). Lesa 1 Korintionan 9:24-27. Kiko Pablo ta bisa akinan tokante di sano huisio? Kiko e ta bisa ku finalmente ta na peliger den henter e asuntu di sano huisio? "E mundu a ser entregá na indulgensha propio. Erornan i fábulanan ta oumentá. Satanas su trampanan pa destruí almanan ta ser multipliká. Tur ku ke santidat pèrfèkto den e temor di Dios, mester siña e lèsnan di temperansha i dominio propio. E apetit i pashon mester keda dominá pa podernan mas haltu di e mente. E sano huisio aki ta esensial na fortalesa mental i bista spiritual ku lo kapasitá nos pa komprondé i praktiká e bèrdatnan sagrado di Dios Su palabra." Ellen G. White, The Desire of Ages, pg. 101. Sano huisio ta mehora atraves di praktikanan kontinuo. Dios a yama boso pa boso "sea santu den tur boso kondukta" (1 Ped. 1:15) i pa "disipliná bo mes den santidat" (1 Tim. 4:7). Mayordomonan mester praktiká i disipliná nan mes pa tin sano huisio meskos ku e atletanan òf músikonan di mas talentoso. Pa medio di Dios Su poder i nos propio esfuerso diligente, nos mester disipliná nos mes den e kosnan ku realmente ta importante. Kon nos por siña someté na e poder di Dios, Kende ta E úniko ku por duna nos e sano huisio ku nos tin mester pa biba komo mayordomonan fiel i piadoso den un mundu kai i korumpi? 6 / 7
Powered by TCPDF (www.tcpdf.org) Pensamentu Mas Profundo: djabierne, 23-03-2018 Enok i Noe tabatin komo hábito pa kana ku Dios den un tempu kaminda poko tabata fiel meimei di hopi materialismo i violensha (Gen. 5:24, 6:9). Nan a komprondé i a aseptá Dios Su grasia, i pues tabata bon mayordomonan di e pertenenshanan i e tareanan konfiá na nan. Durante añanan, hende a bin ta kana ku Dios meskos ku Enok i Noe a hasi. Por ehèmpel, Daniel i su amigunan "a realisá ku pa nan por para komo representantenan di religion bèrdadero meimei di religionnan falsu di paganismo, nan mester tin un mente kla i mester perfekshoná un karakter Kristian. I Dios mes tabata nan Maestro. Resando konstantemente, studiando profundamente, kedando den kontakto ku loke nan no por a mira, nan a kana ku Dios meskos ku Enok." Ellen G. White, Prophets and Kings, pg. 486. "Kana ku Dios" ta definí loke un mayordomo ta hasi ku ta, biba ku Dios dia tras dia riba tera. Un mayordomo sabi lo tin komo hábito pa kana ku Dios meimei di un mundu di korupshon, pasobra solamente pa medio di e konekshon aki ku Dios nos por ta protehá for di kai den maldat vensedor. Ta un fiel mayordomo ta enserá un bida ku ta di akuerdo ku Dios (Amos 3:3). Nos mester kana den Kristu (Kol. 2:6), kana den nobedat di bida (Rom. 6:4), kana den amor (Efe. 5:2), kana den sabiduria (Kol. 4:5), kana den bèrdat (Sal. 86:11), kana den lus (1 Huan 1:7), kana den integridat (Prov. 19:1), kana den Su lei (Eks. 16:4), kana den bon obra (Efe. 2:10), i kana den un kaminda rekto (Prov. 4:26). Preguntanan di Diskushon: 1. Defini humildat i splika su ròl den e bida di un mayordomo (Mat. 11:29, Efe. 4:2, Fil. 2:3, San. 4:10). Dikon humildat ta importante den nos kanamentu ku Dios? (Mik. 6:8). 2. Den klas, papia tokante di maneranan ku nos por yuda esnan rondó di nos ku ta gará den hábitonan malu i outo-destruktivo. Kiko boso komo un iglesia lokal por hasi pa yuda e hendenan ai 3. Kua ta algun otro bon hábitonan ku mayordomonan Kristian mester tin? Wak por ehèmpel Tito 2:7, Sal. 119:172, Mat. 5:8. 4. Den klas, papia tokante di tempu i e misterionan di tempu. Dikon e ta parse di ta pasa bai asina lihé? Kon nos por sikiera komprondé kiko ta tempu? I, mas importante ainda, dikon ta nesesario pa nos ta bon mayordomonan di e relativamente tiki kantidat di dje ku nos tin mientras nos ta riba tera? 7 / 7