Preparando pa Kambio Les 3 di kuartaal 2, aña 2019 Lesa pa e siman aki: 1 Kor. 10:1-13; Gen. 2:24; 1 Kor. 13:4-8; 1 Sam. 1:27; Salmo 71:1-24; 1 Kor. 15:24-26. TEKSTO PRINSIPAL: Hustisia lo bai Su dilanti, i lo hasi Su pasonan nos kaminda (Salmo 85:13,). Preparando pa Kambio sabbat, 13-04-2019 Bida ta yen di kambio. Kosnan ta kambia tur ora. E úniko kos ku no ta kambia ta e realidat di kambio mes. Kambio, de echo, ta un parti di nos eksistensia mes. Asta e leinan di físika parse ta siña ku kambio ta eksistí den e struktura di mas básiko di realidat. Hopi biaha, kambionan ta bin inesperadamente. Nos ta prosedé den un rutina ora, diripiente, instantáneamente, tur kos ta kambia, i nos ta ser kohé kompletamente di sorpresa. Na otro banda, tin biaha nos por mira kambio ta biniendo. Nos ta ser duná spièrtamentunan adelantá, señalnan, indikadónan ku ta laga nos sa ku kosnan ta bai ta diferente. Ora esaki sosodé, ta sabí pa kuminsá prepará, te na kualke grado posibel, pa loke nos por mira bin. Hopi di e kambionan aki ta grandi: matrimonio, yunan, behes, asta morto. I sí, nos no ta biba den isolashon. Kua ta nifiká, anto, ku e kambionan ku ta bin riba nos por impaktá nos famianan, i den gran formanan, tambe. Na mes momentu, kambionan den nos famianan tambe por impaktá kada miembro di famia. E siman aki, laga nos wak algun di e kambionan ku trempan òf lat, den un forma òf otro, mayoria di nos ta afrontá i kon e kambionan aki por impaktá bida familiar. Studia e lès di e siman aki pa prepará pa Sabat, 20 di aprel. 1 / 7
Inesperá djadumingu, 14-04-2019 Tin un kos tokante e Palabra di Dios: e no ta pasa e realidatnan di bida humano por alto. Al kontrario, e ta eksponé nan den tur nan duresa i, tin biaha, doló profundo i desesperashon. De echo, ku eksepshon di e promé páginanan di Beibel i e últimonan na final, e Palabra di Dios ta pinta un kuadro lamentabel di e rasa humano. Pablo no tabata eksagerá ora e a skibi: pasobra tur a peka i ta falta e gloria di Dios (Rom. 3:23). Lesa 1 Korintionan 10:1-13. Ki spièrtamentunan tin, komo tambe promesanan? Den hopi forma, hopi di nos akshonnan den bida ta simplemente kon nos ta reakshoná riba kambio. Konstantemente nos ta afrontá kambio; e desafio pa nos, komo Kristiannan, ta pa dil ku nan pa medio di fe, konfiando den Dios i revelando e fe ei atraves di obediensia, no importá tentashonnan pa hasi di otro forma. E nesesidat di mas grandi di mundu ta e nesesidat di hende, hendenan ku lo no ser kumprá òf bendé, hendenan ku den nan alma di mas íntimo ta sinsero i honesto, hendenan ku no tin miedu di yama piká na su nòmber korekto, hendenan ku nan konsenshi ta mes leal na deber ku e angua na e polo, hendenan ku lo para pa hustisia anke e shelunan ta kai. Ellen G. White, Education, p. 57. E palabranan ei tabata mes bálido pa Israel antiguo ku nan tabata den tempu di Ellen G. White, i ku nan ta pa nos awor. Ki erornan e hendenan den e tèkstnan aki a kometé dilanti di kambio, i kiko nos por siña di nan erornan? Echonan 5:1-10 Gen. 16:1, 2, 5, 6 Mat. 20:20-22 Kambionan ta bin, i hopi biaha nan ta trese tentashonnan, desafionan, i asta, tin biaha, miedu. Por lo tantu, kon krusial ta pa nos tin e armadura spiritual bistí pa dil ku nan na e manera korekto. Un biaha mas, no importá ku sea e kambionan ta inesperá òf sea nan ta simplemente e parti típiko di bida, nos mester ta prepará pa loke ta biniendo, tantu loke ta visibel komo loke ta invisibel. 2 / 7
Preparando pa Matrimonnio djaluna, 15-04-2019 Un di e kambionan di mas grandi ku un persona ta afrontá ta ora e ta bai kasa. Naturalmente, no ta tur hende ta kasa. Despues di tur kos, Hesus, nos ehèmpel di mas grandi, nunka a kasa, ni hopi otro personahenan di Beibel. Sinembargo, hopi hende ta kasa, i por lo tantu, Beibel no ta ketu tokante matrimonio, kua siguramente ta un di e kambionan di bida di mas grandi. E promé areglo sosial menshoná den Beibel ta matrimonio. Pa Dios, matrimonio ta asina importante ku e mesun palabranan ku E a bisa Adam i Eva den Eden tokante matrimonio ta aparesé na tres otro lugá den Skritura. P esei un hòmber lo bandoná su tata i su mama, i lo uni ku su esposa: i nan lo ta un karni (Gen. 2:24; lesa tambe Mat. 19:5, Marko 10:7, Efe. 5:31). E tèkstnan aki ta bisa nos ku unabes un hende kasa, e relashon di mas importante den nan bida mester ta entre e i su kasá, asta mas ku entre nan i nan mayornan. Entre e rasonnan ku matrimonio entre un hòmber i un muhé ta asina importante pa Dios ta ku e ta tipifiká e relashon ku ta eksistí entre Su Yu, Hesus, i e iglesia, Su brùit (Efe. 5:32). Ora ta konstruí un kas, hende mester para ketu i konsiderá e kosto (Lukas 14:28-30); kuantu mas ora ta establesé un hogar? Un kas ta ser trahá ku blòki i semènt, palu i heru, waya i glas. Pero un hogar ta ser trahá ku kosnan ku no nesesariamente ta material. Kiko ta algun kriterio krusial ku ta importante pa tur aspekto di bida pero ta spesialmente importante pa esnan ku ta preparando pa matrimonio? 1 Kor. 13:4-8; Gal. 5:22, 23 Preparashon pa matrimonio mester kuminsá ku nos personalmente i individualmente. Na mes momentu, nos mester wak nos futuro kasá kuidadosamente pa mira si e lo por ta un bon komplementu pa nos. E ta traha duru? (Prov. 24:30-34). E tin mal genio? (Prov. 22:24). Nos ta kompartí kreensianan komun? (2 Kor. 6:14, 15). Kon mi famia i amigunan ta sinti tokante mi futuro esposo/esposa? (Prov. 1:14). Mi ta dependé riba fe òf riba sintimentu so? (Prov. 3:5, 6). E kontestanan riba e preguntanan aki por nifiká un futuro di felisidat òf un bida largu di tristesa. Pensa riba algun bon matrimonio. Ki prinsipionan bo ta topa einan ku tambe lo por ser apliká na otro tiponan di relashonnan interpersonal? 3 / 7
Prepará pa Paternidat djamars, 16-04-2019 Poko kos por kambia nos bida mas ku e nasementu di un yu. Nada den famia hamas por òf lo ta meskos atrobe. Manera flechanan den man di un guerero, asina ta e yunan di hende su hubentut. Felis ta e hende ku tin su mochila yen di nan (Salmo 127:4, 5,). Na mes momentu, yunan no ta bin ku un manual di instrukshon ku ta bisa e mayornan tur loke nan tin mester pa kuida nan i kon pa solushoná kualke problema ku por surgi. Asta mayornan eksperensiá tin biaha ta ser konfundí pa e akshonnan, palabranan, òf aktitutnan di nan yunan. Mes importante ku ta pa prepará pa matrimonio, ta importante tambe pa esnan ku ta spera di bira mayor di ta prepará pa e responsabilidat inkreibel ei. Ounke kon úniko e siguiente storianan tokante nasementunan tabata, ki prinsipionan esnan ku ta preparando pa ta mayornan por saka for di e relatonan aki? 1 Sam. 1:27; Huesnan13:7; Lukas 1:6, 13-17, 39-45, 46-55, 76-79. Ki un responsabilidat i oportunidat ekstraordinario e mayornan aki tabatin. Tres lo tabata e mayornan di profetanan i lidernan na Israel, un di nan yunan lo tabata e prekursor di e Mesias primintí, i un d e yunan lo tabata e Kristu. Sinembargo, asta si nos yunan no ta destiná pa ta profetanan bíbliko, ainda mayornan mester ta preparando pa e kambio radikal aki den nan bida. Asta promé ku nasementu di e yu, e preparashon, ku lo kapasit é pa bringa e bataya kontra maldat ku éksito, mester kuminsá. Si promé ku nasementu di su yu e ta gusta komplasé su mes, si e ta egoista, sin pasenshi, i eksigente, e rasgonan di karakter aki lo ser reflehá den e temperamentu di e yu. Asina hopi mucha a risibí komo herensia tendensianan kasi iresistibel na maldat. Ellen G. White, The Adventist Home, p. 256. Sea ta muchanan bou di nos kuido òf si nos tin responsabilidatnan pa ku otro hende, kiko nos por hasi pa kumpli ku e responsabilidatnan ei den e forma mas piadoso posibel? 4 / 7
Prepará pa Behes djarason, 17-04-2019 E dianan di nos bida ta setenta aña; i si pa motibu di forsa nan ta ochenta aña, tòg nan gabamentu ta molèster i tristesa; pasobra pronto e ta pasa, i nos ta bula bai (Salmo 90:10,). E palabranan aki di Moises ta kòrda nos riba e marcha irevokabel di tempu. Segun ku e añanan ta bin i bai, nos ta kuminsá mira i sinti kambionan den nos kurpa. Nos kabei ta bira blanku òf ta kai, nos ta kuminsá hasi kosnan mas pokopoko, i molèster i doló ta bira nos kompañeronan diario. Si nos ta kasá i ku yu, nos yunan kisas tin nan propio yunan, i e ora ei nos lo por disfrutá di nos ñetunan. E etapanan anterior di bida a yuda nos prepará pa e último. Lesa Salmo 71. Kiko e salmo aki ta siña nos tokante no solamente prepará pa behes, sino tambe tokante bida en general? Salmo 71 ta e salmo di un persona mayó ku ta eksperensiá e desafionan ku ta bin ku bida, pero ku ta felis pasobra tur e tempu e a pone su konfiansa den Dios. E mihó manera pa bira bieu ta pa pone nos konfiansa den dje miéntras nos ta hóben ainda. Den términonan general, e outor di e salmo aki ta kompartí tres lès importante ku e a siña miéntras e tabata avansá den direkshon di e etapa aki di su bida. 1. Desaroyá un konosementu profundo i personal di Dios. For di su hubentut (Salmo 71:17), Dios tabata su refugio fuerte (Salmo 71:1, 7) i su Salbador (Salmo 71:2). Dios ta un baranka i un fòrti (Salmo 71:3), su speransa i konfiansa (Salmo 71:5). E ta papia di e echonan poderoso di Dios (Salmo 71:16, 17), i Su fortalesa i poder (Salmo 71:18), i tur e kosnan grandi ku E a hasi (Salmo 71:19). Finalmente e ta grita: O Dios, ken ta manera Bo? (Salmo 71:19,). E kòmbersashonnan diario ei ku Dios, ora nos ta studia Su Palabra i ora nos wanta un ratu pa reflekshoná riba tur loke E ta hasi pa nos, lo profundisá nos eksperensia kune. 2. Desaroyá bon kustumbernan. Bon nutrishon, ehersisio, awa, lus di solo, sosiegu, etcetera lo yuda nos disfrutá bida mas largu i mihó. Tuma nota spesial di kon e salmista ta referí na e kustumbernan di konfiansa (Salmo 71:3), alabansa (Salmo 71:6), i speransa (Salmo 71:14). 3. Desaroyá un pashon pa e mishon di Dios. E persona den e salmo aki no tabata wak padilanti na ta inaktivo den su behes. Asta den su hubilashon e tabata kier a sigui alabá Dios (Salmo 71:8) i konta otronan di dje (Salmo 71:15-18). Pa esnan ku ta di mas edat, kiko ta algun di e benefishinan di bira bieu? Kiko bo sa awor ku bo no tabata sa ora bo tabata mas hóben, ku bo por kompartí ku esnan ku ta mas hóben? 5 / 7
Prepará pa Morto djaweps, 18-04-2019 A ménos ku nos ta bibu na e Segundo Binida, un kambio ku nos tur por spera ta e kambio di mas grandi di tur: di bida pa morto. Huntu ku matrimonio i nasementu, ki kambio tin un impakto mas grandi riba famia ku morto di un miembro di famia inmediato? Lesa 1 Korintionan 15:24-26. Kiko e versíkulonan aki ta siña nos tokante morto? Hopi biaha, naturalmente, morto ta bin den forma inesperá i trágiko. Kuantu hende hòmber, muhé, asta mucha, a lanta un mainta solamente, promé ku solo drenta, pa sera nan wowo no pa drumi sino pa muri? Òf a lanta un mainta i promé ku solo a baha a pèrdè un miembro di famia? Ku eksepshon di sigurá ku bo ta konektá pa medio di fe ku Señor i ta kubrí den Su hustisia kada momentu (lesa Rom. 3:22), bo no por prepará pa un morto ku bo no ta mira ta bin, sea pa bo mes òf bo ser kerí. Na otro banda, kiko lo bo a hasi si bo tabata sa ku bo tabatin solamente un par di luna pa biba? Kisas nos no sa sigur ki ora morto lo vense nos, pero siguramente nos por sa ki ora nos ta aserkando e fin di nos bida. Por lo tantu, kon krusial ta pa prepará nos mes i nos famia pa loke ta inevitabel. Lesa 1 Reinan 2:1-4, algun di e último palabranan ku David a bisa su yu Salomon. Ki lèsnan nos por saka for di esaki tokante prepará pa morto, tantu pa nos mes komo pa miembronan di famia? Na promé bista, hende lo por argumentá: Ki ironia! David ku a asesiná Urias despues di a saka su esposa na estado den un relashon adúltero (lesa 2 Sammuel 11), ta bisa su yu pa kana den kaminda di Señor. Na otro banda, kisas tabata presisamente pa motibu di su piká i e konsekuensianan horibel ku a sigui ku e palabranan di David tabata asina poderoso. E tabata, sin duda, den su propio forma tratando di spièrta su yu di e lokura ku a kous é asina tantu ferdrit. David a siña, na malu, algun lès difísil tokante e preis di piká, i sin duda e a spera di spar su yu di e doló ku e mes a eksperensiá. 6 / 7
Powered by TCPDF (www.tcpdf.org) Pa mas Estudio: djabierne, 19-04-2019 Si nos lesa e storia di Israel antiguo den desierto, nos por mira un letania di eror tras di eror dilanti di gran kambionan, asta apesar di e revelashon asombroso di e amor i poder di Dios. De echo, promé ku Israel finalmente mester a drenta e Tera Primintí, i asina afrontá un otro gran kambio, Moises a bisa Israel antiguo lo siguiente: "Boso wowonan a mira loke Señor a hasi den e kaso di Baal Peor, pasobra tur hòmber ku tabata sigui Baal Peor, Señor bo Dios a destruí nan for di meimei di boso. Ma boso ku a keda fiel na Señor boso Dios ta na bida te awe, kada un di boso. Mira, mi a siña boso statutonan i huisionan meskos ku Señor mi Dios a ordenámi, pa boso hasi asina na e tera ku boso ta bai drenta pa poderá di djé. Asina anto, warda nan i kumpli ku nan, pasobra esei ta boso sabiduria i boso komprendementu den bista di e pueblonan ku lo tende tur e statutonan aki i bisa: 'Siguramente e nashon grandi aki ta un pueblo sabí i di komprendementu.' Pasobra ki gran nashon tin, ku tin un dios asina serka di dje, manera Señor nos Dios ta ki ora ku nos yama na dje? Òf ki gran nashon tin, ku tin statutonan i huisionan asina hustu, manera henter e lei aki ku mi ta pone boso dilanti awe? Solamente, paga tinu i warda bo alma ku tur diligensia, pa bo no lubidá e kosnan ku bo wowo a mira, i pa nan no kita for di bo kurason tur e dianan di bo bida; ma siña nan na bo yunan i na bo ñetunan (Deut. 4:3-19,). Kon krusial ta pa nos no lubidá loke Señor a hasi pa nos. I ki mihó manera pa no lubidá ku siñ é na otronan i na esnan ku ta bin despues di nos. Nota tambe kon sentral e famia tabata den tur esaki, i ku nan mester a siña e kosnan aki na nan yunan. I e piká na Peor tabata algu ku por tabata solamente destruktivo na bida familiar. E krímen ku a trese e huisio di Dios riba Israel tabata esun di libertinahe. E kurashi di hendenan muhé pa pone almanan kai den trampu no a terminá na Baal-peor. Ellen G. White, The Adventist Home, p. 326. Preguntanan di Diskushon: 1. Den klas, papia tokante algun di e preparashonnan ku boso a hasi pa afrontá kualke di e fasenan grandi den bida, matrimonio, kriansa di yu, behes, òf kualke otro kos. Kon e kambionan a impaktá bo famia? Kiko bo a siña ku lo por yuda otronan ku ta aforntá e mesun etapanan? 2. Pensa riba e palabranan di David na Salomon, atrobe den konteksto di su piká ku Betseba, un kalamidat ku a tira un sombra riba restu di e reinado di David i a impaktá su famia grandemente pa malu. Di ki forma, meimei di tur esaki, nos ta mira e realidat di e grasia di Dios den akshon? 7 / 7